港足勇奪東亞運金牌，煲呔表現興奮，但一班球迷就唔多滿意政府一直以嚟對足運支援不足，發起聽日舉行「振興足球港府有責」大遊行，召集本港球迷及港足職球員着紅衫，下午兩點九喺遮打花園集合，遊行去政府總部，要求港府檢討對香港足球運動嘅支持。
佢哋嘅要求都好具體，包括要求政府增建標準球場同加強配套設施、增撥資源培訓青年球員、支援足總優化本地聯賽、要求港台重新直播本地足球賽事；佢哋又針對足總嘅管治問題，要求足總加強透明度、監察各球會財政等等。發起人李健文話，根據網上回應，已有超過120個球迷表示參加，約250人正在考慮。