噚日聖誕，洋人普天同慶，中國人就普天同㷫。因為起草《○八憲章》提出中國民主、改善人權嘅訴求，因為寫幾篇文章批評中共獨裁嘅事實，劉曉波就被指煽動顛覆國家政權，判監11年。身為中國人，真係好很㷫，點解今時今日北京政權仲係咁無恥？連支聯會噚日去中聯辦請願，想話綁啲黃絲帶喺門外，中聯辦都要派人嚟剪走佢，仲連請願者隻手指都剪傷埋。
據支聯會副主席李卓人講，當時有個中聯辦實Q拎住把鉸剪，要剪佢哋聲援劉曉波嘅黃絲帶，有個支聯會成員當時仲捉住條絲帶，但個實Q仍然剪落去，個支聯會成員隻手即刻受傷流血見紅。阿人佢哋覺得對方實在欺人太甚，即場報警，投訴對方傷人。
呢個實Q唔止手起刀落剪嘢叻，仲好敬業樂業投入角色。話說有個請願者突然成功衝入中聯辦閘內，警方同實Q陣腳大亂，其他人趁機一擁而上，大家推撞之間，呢位實Q突然間「哎吔」一聲，然後慢動作倒地，而且顯得不省人事毫無反應。冇耐又有個警察同兩個支聯會成員先後跌低，大家瞓晒喺地。
警方話，受傷四人全部送晒去瑪麗醫院治理，案件仍在調查中，暫時無人被捕。