藉着鏡頭說出風格多變、既有浪漫又有刺激也帶實驗的千言萬語，夏永康（WingShya）的作品都令「我們這一代」看得津津有味有feel有得着。攝影機跟身17個年頭，Wing最新染指電影，處女作《全城熱戀．熱辣辣》借電影鏡頭說他想要說關於對愛情堅持的故事，「何事都要堅持，包括媾女！我嘗試溝樣新嘢畀大家睇！」
撰文：梁錦貞
●電影－初次執導筒
夏永康最近與好友TonyChan首次執起導演筒，將於2月公映的《全城熱戀．熱辣辣》是由五段短片砌成的現代人愛情故事，他說：「四張幾先第一次做導演算遲，不過如果我早10年做導演，一定淨係掛住演嘢、掛住要爆。家我同拍檔嘅目的係要拍一套關於『家』嘅嘢，要自然生活化，有人性，要大家睇得明，唔離開群眾，當然我玩咗嘢你都唔覺！」
Wing說：「套戲係圍繞住幾段愛情故事，主題訊息係要堅持，唔好放棄，好簡單，就好似媾女，想掂都係要堅持，我主力負責影像，Tony就主力劇本對白。」
拍戲當甜品
Wing續說：「同影相嚟比，一張相點都係一張相，極其量係誇啲威啲，但係電影方法就好多，有場景、有對白、有音樂，容易帶出motion，為咗拍出自然生活化，我專登一套偏嘢都唔睇，盡量唔畀呢啲嘢入腦，例如我哋要拍食飯shot，反而睇好多呢類reference，好似《奇幻逆緣》（TheCuriousCaseofBenjaminButton）、《色，戒》咁，原來拍生活化嘅shot好難，激動嘅大喊大叫跳海就容乜易。」
Wing自言對票房成績沒有壓力，他說：「我當呢部戲係甜品，影相先至係碗飯，唔得嘅都仲有飯開，永遠抱住當佢係最後一部咁拍。」終於做導演，他指最大鼓勵來自張叔平，他說：「阿叔話：『玩啦，試啦，唔使有包袱，想做咪做囉』。」問他跟王家衛合作多時，有否偷到嘢用?他說：「冇嘢用得着！因為佢嘅嘢始終係佢嘅，我幫王家衛影相都係佢隻手嚟o架咋，啲嘢始終係佢同阿叔嘅。」
●攝影－瀨嘢變風格
WingShya身為王家衛御用攝影師，曾為《春光乍洩》及《花樣年華》等電影拍劇照。他先後畢業於李惠利工業學校、白英奇專業學校及加拿大EmilyCarrInstitute，主修FineArt，大學時最迷就是AndyWarhol及《Interview》，從沒輕視商業，只認為自己無法handle。在商台工作時，一天林海峰（Jan）跟他說：「我老婆要出碟，你幫佢影封面啦。」拎起相機的第一個機會，是阿Jan給他的。
喜好勝技術
Wing說：「我仲記得彭羚嗰隻碟叫《CforCass》，跟住逐啲逐啲有唔同人叫我影嘢，其實我影親唔係鬆就矇或者under，直接啲講就係瀨嘢！啲人問點解會咁，梗係死撐話特登同style啦！有次阿智（蔡一智）畀機會我幫鄭秀文影佢隻碟《十誡》封面，我就想影得好colorful，走去買啲彩色紙用嚟打燈，點知買錯晒啲聖誕玻璃紙，仲燒爛埋人哋studio啲燈！直至有次幫《amoeba》影阿Jan，真係衰晒，又係under，之後SamWong打電話畀我『你啲相真係好un（under）喎』，對住佢我仲敢撐咩？當然認係唔識嘢瀨嘢啦！點知佢話『我就係鍾意你唔X識』，吓！SamWong都咁講，就有恃無恐直情用FineArt嘅角度同方法去影啦，慢慢真係成為所謂我嘅風格，係感情同喜好多過技術。」
●飛佛大師
講到「飛佛」的攝影師，Wing說：「AndyWarhol唔在講啦，一樣嘢就夠做，你畀個麥當娜（Madonna）喺佢面前都係影Polaroid！另外我仲鍾意NanGoldin、TerryRichardson、RichardAvedon同荒木經惟，佢哋幾個風格都唔一樣，不過都係離不開一種好強烈自己鍾意嘅嘢，慢慢出咗嚟就係自己嘅特色風格，我冇諗過要似佢哋，因為我諗我冇佢哋咁癲同咁大勇氣，最主要都係因為我性格都係怕醜，你睇我嘅作品其實已經去盡咗o架啦，我唔敢大搖大擺去投入，只係會隔住條門罅去偷窺。」
四大鍾情名師作品
●後話：
由取得國際級潮書如《i-D》入場券開始，Wing這些年還有為巴黎《VOGUE》、日本《VOGUE》等等操刀，未來project，他hyper形容如取得奧運參賽資格，是明年將為意大利《VOGUE》及熱爆歌姬LadyGaGa拍攝當Polaroid代言的廣告照。
