亨泰（197）呢期主攻農業，食住扶農國策，有得諗。今個星期二，內地報章話阿爺將加大農機具購置補貼力度，第一拖拉機（038）應聲彈上。呢壇消息，印證阿爺貫徹扶農方針不變。要咁睇，亨泰唔係主打拖拉機，但集團上年喺江西買入2萬畝農地使用權，力拓上游農業，主攻瓣數亦食住好似政府補貼等扶農國策。
再講，阿爺上年尾推出振內需措施，效果喺各行各業逐步到位，而亨泰原有嘅消費品分銷業，亦有回穩增長條件。唔好計多，亨泰2010年度純利，返番08年度2.5億銀水位，連埋今年中供股攤薄效應反映，預期PE都係得7、8倍水位。講內需、講農業瓣數，呢個PE都好抵買。博亨泰現價0.78元翻半番到1.18元，2010年度預期PE，都係講緊12倍水位，亨泰仲係好平。
力寶翻一番至啱數
力寶（226）最近半年累積升幅27%，系內力寶華潤（156）同期升幅挨近80%，阿媽力寶超級大落後。又力寶最新NAV近9.30元，折讓高達70%，阿仔力華，經呢期上升，NAV折讓收窄到33%，力寶同近磅磚頭股又或者力華比，有咁嘅折讓，實情賣大包。力寶要追到上力華嘅折讓水位，講緊翻一番至啱數。呢轉短打，博現價2.68元升20%到3.22元，一啲唔過份。
錢雋