亞視股東之爭，以事論事，台灣蔡衍明居於下風，佢猛咁發動傳媒攻勢，搵香港記者過台灣與佢見面，好似係博同情啫；蔡家入股之時，明知股權結構牢牢地由查家揸住，仲肯簽字落去，已經定咗輸贏啦。台灣經紀M同左丁山講：「你地香港人好奸，賣股賣成咁，人地要出錢，冇控制性股權，你地就唔出錢，揸住股權不放。」
左丁山哈哈笑：「商業世界嘅公司買賣交易，邊度可以講忠奸o架，現代M&A（併購），買賣雙方都有財務顧問做盡職審查，有大律師樓做代表擬定文件，將雙方交易條件寫落文件時，每隻字都要驗屍咁驗，為咗一頁文字可以改來改去磨足一日，最後雙方簽字作實，係你情我願嘅啫，後來發覺吃虧嘅一方只能嘆一句自己笨實，與人無尤。」
經紀M仲係咿咿哦哦，冇法啦，此乃港台商業文化之不同。台灣富豪愛面子，愛閒話一句，簽字握手作實。香港富豪第一代也有此作風，但到了第二代（查懋聲、李澤楷、郭炳江、羅嘉瑞等等等）做法已經全盤西化，學足紐約作風，談判條件及法律文件時絕不心慈手軟。蔡衍明話自己親自談判，冇帶律師，信錯人喎。真係對唔住講一句，下次信過第二個啦。
查懋聲乃公司買賣高手，經驗豐富到極，二十餘年前佢地集團買入幾間酒店之時，曾用過「胡關李羅」做律師。張永霖嘅弟弟張永森律師就代表過查家公司做併購法律文件，對手無不呼叫一聲：「厲害，厲害。」，一定搵埋起碼同樣有經驗嘅律師做代表與查家及張永森力磨到底。查家當然唔止用一間律師樓啦，以佢地嘅財力與廣闊人脈網絡，乜人都可以搵到做佢地嘅顧問。
查氏一族來自浙江海寧，族人歷來出過不少名人雅士，二十世紀最出名嗰位恐怕係查良鏞，筆名金庸，好少人知嘅，就係香港股壇大名人，香植球之香氏與查氏之查，大有關係。古老相傳，宋帝昺1279年逃難香江，由陸秀夫在青山背住跳海之時，沿途護駕者有一位查姓將軍，查將軍率領殘餘部隊由青山入東莞，路經茶山，靈機一觸，就在今之橫瀝鎮落戶，為避蒙古兵追殺就將查字下面一畫改為上面一畫，於是姓查變咗姓香，今天姓查是浙江人，姓香是廣東人，七百年前同是一族。