最近出任香港中策集團主席嘅前局長馬時亨，唔經唔覺已經喺商台開咪3個月，由雙十節起主持咗11集《馬教授，你好！》。去到結局篇壓軸一集，肥馬除咗重溫做節目點滴，呼籲年輕人發放正能量外，亦特別大談昔日喺加拿大做股票分析員嘅血淚史。佢話開咪幾個月，記憶最深嘅係講到有關年輕人集體自殺嗰集，大嘆年輕人輕言尋死，究竟有冇想過父母感受？
齋講當然悶咗啲，所以佢走出錄音室，去到一間餐廳宴請過往同佢做過節目嘅年輕人，嘆咗餐豐富聖誕大餐。比起做官時瘦咗成個碼嘅肥馬同年輕人齊齊舉起V字手勢，似乎食得好愉快。如果想知道肥馬喺加拿大生活幾咁有血有淚，今晚10點可收聽商業一台。