開機、《FF》、開機、《FF》、開機、《FF》，今個12月神級RPG《FF13》推出，大作統統讓路，只有NDS隻《撒爾達》夠薑正面交鋒。但作為消費者，仲想有得揀，雖然PSP隻《MetalGearSolid：PeaceWalker》正式版3月先出，但試玩版就已經有得喺PSN免費下載，今次仲強調玩連線合作，年尾流流，唔好一個人咁寂寞啦！
記者：阿洛
唔係阿蛇 係大波士
《MetalGear》嘅正統續篇作，由監督小島秀夫親自編劇研發，靠得住。今次故事係以《MetalGear3》故事完結後10年作背景，即係1974年，無正式國防武力嘅哥斯達黎加遭受神秘非法武裝組織入侵，而因為呢個武裝組織又同美國CIA有聯繫，所以BigBoss喺無軍方支援下，焗住私下成立無國界部隊暗中幫拖，解除威脅。
手提機極限級畫面
開機，Opening依然一貫有電影感，好有氣氛，而內容方面，就同東京Gameshow現場Konami攤位提供嘅試玩版一樣，連教學合共有3個任務，最多可4人連線合作。一開始係教學模式，轉動視點、踎低瞓地、攻擊，操作同好多人仲玩緊嘅《MetalGearOnline》相類近，行家出手好快上手。而驚喜係畫面表現落雨天同沙灘海浪都好細膩，仲有係劇情部份係以漫畫方式呈現，仲有啲情況係要玩家參與操作，例如用火箭炮瞄準直升機等，無齋睇咁悶。
4人連線過關
放得喺PSP出，梗係對應adhoc連線，今次強調玩合作，唔再係孤軍潛入，除咗可以互換武器外，有啲關卡地形仲一定要有人幫拖先過到。而角色方面，試玩版就全部都係BigBoss樣貌，只係配以不同裝備同能力，有移動力高嘅，亦有可以帶較多武器嘅，4人組合可以互補長短，過關效率自然提高400%！
遊戲同時預定導入語音合成系統NetVOCALOID，玩家可以設計他們所想要的歌詞或台詞加入遊戲中，讓遊戲角色可以唱出或講出這些內容，使遊戲更有趣。
Profile
遊戲：《MetalGearSolid：PeaceWalker》
機種：PSP
製作廠商：Konami
類型：動作
人數：4人
推出日期：2010年3月
