社公總辭、五區公投爭議欲罷不能，更已深入草根。有人發現深水埗高登電腦商場附近鴨寮街公廁，近日竟然出現一場公投大激辯，贊成與反對公投者一瀉千里，暢所欲言，喺廁格疾書正反論點，蔚為奇觀，當年北京西單民主牆遺風，乍現香港。
呢個高登公廁，八方相信唔少毒男、電車佬曾經「光顧」，大家唔好以為喺廁格塗鴉純屬一派胡言，實情當中卧虎藏龍，有唔少政見精闢有識之士；有人認為不要輕信人大常委提出嘅所謂政改時間表，「共產黨任何政治承諾，都是放煙霧彈，欺騙，放空炮，大話精。」能夠一矢中的指出當前政治大形勢，提出要保持頭腦清醒，呢個廁客似非泛泛之輩。
真理越「便」越明
政府提出嘅政改諮詢文件，被批評翻叮05年方案，逼市民硬啃，喺呢場公廁大辯論中，就有人提出精闢嘅分析，「換湯不換藥的政改方案，何嘗不是一劑政治大騙局！街頭寶藥黨，去欺騙政治低B的人、阿婆。」將推銷政改方案高官比喻為街頭行騙寶藥黨，可謂大快人心！
對於總辭嘅問題，有人喺廁格內直指係欺騙市民嘅政治動作，「泛民請辭，勞民傷財。」支持公投嘅人不忿新民主運動被抹黑，辦大事之際都忍唔住提筆反駁，「五區總辭已令保皇哈巴狗驚慌失措，坐立不安，聞風喪膽。」
呢場高登公廁公投大激辯看來意猶未盡，八方相信陸續有來。喺呢個高登公廁討論區之中有如此高水平政治辯論，較諸立法會內廢話連篇嘅詭辯、狡辯，呢啲先至係真正民意，有網民更指真理越「便」越明，最好全港公廁都變成討論五區公投民主牆，當市民越討論得多，公投成功機會就越大。
深水埗以前係民協基地，近年被民建聯侵蝕逐漸失守，睇完呢場旗鼓相當嘅辯論，八方有番啲信心，相信泛民遲早可收復失地，只怕看管公廁嘅食環署插手干預，打壓言論自由，將大鳴大放政治言論抹去，「鴨寮街之春」無疾而終。
