承認好重視民望嘅煲呔，噚日請咗40幾個喺嚟自深水埗嘅小朋友去禮賓府開聖誕派對，請埋聖誕老人表演魔術，主人家則做導遊，帶團暢遊禮賓府。小朋友都對呢幢有成150年歷史嘅古蹟非常感興趣同好奇，問咗唔少古怪問題，包括「電燈壞咗點算？」煲呔應該會答：「換個慳電膽。」
童言無忌，有小朋友喺送畀煲呔嘅聖誕卡內，寫咗句好搶眼嘅「祝你長命一點」，冇人知道點解小朋友只係想煲呔長命「一點」，而唔係長命百歲，煲呔就話睇見時「不禁失笑」，話呢啲就係小朋友嘅直率同可愛。
09年對煲呔嚟講好似坐過山車咁大起大落，展望將來，佢話來年充滿變數，希望大家互助互愛互相支持，言下之意係咪想政黨幫手、傳媒手下留情？