組合Iloveyouboyz（艾粒）前晚喺理工大學舉行「艾粒普世歡騰核能人2009X'masILUBFinalShow」，方力申、王菀之同張詠恩都有捧場。最後一次一齊做舞台劇，少爺占同Donald實行玩到盡，扮《宮心計》造型又扮女人，狂寸娛樂圈藝人。佢哋喺播番以前扮叮噹嘅片段時話：「咁搞笑，嚟日本咪唔掂，不如好似關楚耀同Jill（衞詩）咁以後唔俾佢哋入境啦。」
玩埋富貴門
演趣劇時，佢哋同隨從扮《富貴門》中戚美珍撞破呂良偉同郭可盈纏綿，點知隨從撲出嚟問點可以做得咁三級，Donald就話：「電視都有得播，你又唔投訴？《活著》啲非洲人唔戴胸圍都四圍走啦。」趣劇內容講到Donald想變做細路哥，竟然話：「我想學樂基兒，細嘅時候想大，大時又想細。」明寸樂基兒隆胸後又拆彈縮胸。卒之Donald變咗小朋友，而少爺占就變做皇帝，位隨從又話：「我跟咗你咁多年，點解唔俾我做皇帝，要俾阿占做？」Donald答：「小美夠跟咗城城咁耐啦，會唔會變咗熊黛林呀？」
爆小美詐型
講到解散原因，Donald話：「本來艾粒係最騎呢同核突嘅，家娛樂圈太多人核突，食煙扮唔食，又吸毒又走光，夾胸影相仲騎呢，佢哋更加艾粒啦。」
Donald又話家仲有人叫佢Ronald，所以嬲到震喎，但佢哋成日玩人，唔怕人哋嬲到震咩？佢就話：「小美試過直接打入直播室啦，其實我哋知邊個玩得先玩嘅。」
二人又不停說諧音粗口，如「臭膠鞋」、「好潤蠢」及「核能人」等。
