久唔久就聽到一啲港澳高官用普通話演講，到目前為止，似乎以金管局總裁陳德霖講得最似樣，前總裁任志剛最近到北京演講，now有播出，聽落就知道係香港人講官話；非官員之中，聽過梁振英演講，咦，呢位先生有料到啫，演辭寫得深入，明顯做好功課，普通話講得似大陸人，實係落過一番苦功啦，本身係外省人嘅唐司長，發音都未夠振英哥咁標準。左丁山講普通話就認真麻麻，頂多好過曹仁超少少，但聽普通話呢，因為讀大學時，教授來自山東、上海、無錫、四川、湖南，各人鄉音不改，故此訓練到我哋一班學生聽懂各類發音嘅國語。某日聽港交所候任行政總裁李小加演講，之後佢問：「你聽不聽得懂？」梗係聽得懂啦，李小加演講順暢不看貓紙，鄉音甚少，本地商界行政人員如果學到佢咁樣水平，到北京、上海就冇有怕。
十二月二十日聽澳門行政長官宣誓就職，佢啲普通話發音似乎與曹仁超不相伯仲，令人奇怪。崔先生做咗澳門高官十年，點解咁耐都唔搵私家老師補習呢？曹仁超與左丁山呢類人少與大陸人接觸，又覺得冇乜大需要，講普通話唔掂，用內地術語講：「是可以理解的。」但特區高官喎，明知北上見官係職務所需，仲唔日學夜學？上個月有幸參加晚宴，泰國公主詩琳通係貴賓，公主與金耀基教授以普通話講唐詩，金教授都驚異於公主之普通話能力，據公主講，佢每個星期六上普通話課三小時，老師係中國駐曼谷大使館派出嚟嘅。泰國公主咁努力學普通話，香港澳門特區高官如不努力去學，平民難以明白。
當特首就職之時，肥仔K適值跟老師學緊普通話，老師自電視畫面聽到「就任」兩字，哇一聲笑出嚟，警戒肥仔K如何發音。肥仔K問老師胡錦濤嘅普通話水平，老師話：「胡是安徽人，帶有鄉音，溫家寶是北方人，說得比較好一點。」老師來自遼寧，教書五十年，聽佢講普通話，易聽到極。但事在人為啫，老師話佢仍然學習緊崑曲，而教佢唱崑曲嘅係一位香港廣東人！