仲有兩個月就79歲嘅華叔，冇煙酒習慣，身體向來好壯健，噚日現身網台節目《呻吟透視》時，八方發現佢聲沙兼痰上頸，順口問候華叔叫佢保重，華叔就話確係有啲唔妥，日前做定期身體檢查，心臟醫生幫佢照肺，赫然發現個肺有陰影，由於佢一把年紀，慎重起見，醫生安排佢聽日再做電腦掃描check清楚。
華叔近日為咗總辭問題同各路人馬激辯，更有人好唔客氣批評佢，華叔唔係因此激到病啩？恐防華叔對總辭、公投有陰影，多談加劇病情，因此八方噚日都唔敢多提，華叔則話陰影可能係廿幾歲時患肺病所致，相信無大礙。
準備元旦參加大遊行
華叔確係老當益壯，噚日一早就去到西環中聯辦聲援劉曉波，之後接受網台訪問，下午如常去游水，又表明會參加元旦大遊行，呼籲市民當日同多啲朋友參加，最好帶埋示威牌講出自己心聲。一日連走幾場，華叔狀態甚佳，主持問佢對於「80後」成為社民連生力軍有何看法。
雖然呢班後生仔曾去民主黨總部踩場，批評民主黨唔參加總辭，不過華叔仍然大讚佢哋熱情可嘉，同時建議佢哋要有打持久戰準備，最好多做實際地區工作，「民主道路上，不能只有一時之勇，更重要係堅持精神，因為民主唔係一個晚上可以從天而降。」
有後生仔戲劇性跪求民主黨加入公投，華叔指咁做唔啱，「呢啲其實係奴才嘅態度，爭取民主唔係咁樣。」
「80後」踩場無傷大雅，華叔話最不滿嘅，其實係佢哋竟然送咗個「2012年安心上路」嘅花牌畀民主黨，「叫人上路，咁即係送人去死啫，呢個唔係正常爭取民主態度。」
不滿惡意攻擊民主黨
佢指民主黨好樂意溝通，大家其實可以友善討論問題，毋須惡意攻擊，「我可以話，佢哋係喺度玩。」見慣風浪嘅華叔稱，被人罵足幾十年，對近日針對佢嘅批評冇放在心上，總之啱嘅就接受，無理取鬧者，一笑置之可也。
mailto:[email protected]