嗰邊廂江陳會落幕，呢邊廂我哋嘅廉政專員湯顯明噚日亦結束歷史性首次訪台之旅返到香港。由於歷史同政治原因，香港同台灣冇正式司法互助或協查案件嘅機制，因此一啲香港廉記通緝咗幾十年嘅前華探長等人物，可落腳台灣長嘆，雖然專員此行冇傾到具體案件，但總算係一次突破。
湯專員今次係應台灣法務部邀請，先後同「馬英九眼中最美的女人」法務部長王清峰、監察院長王建煊等官員會面，又參加專題演講同研討會介紹香港反貪工作，並且同當地反貪、檢察、監察人員以及廉政專家、學者交流。廉署新聞稿學埋特區政府「政治正確」，只稱呼台官為「法務機關主管」、「監察機關主管」，冇寫正式官銜。