現年45歲嘅張曼玉，同細佢七年嘅建築師男友OleScheeren拍拖兩年，一直長居北京，噚日內地網站突然流傳佢哋噚晚喺北京訂婚嘅消息，放料人係自稱「明星經理人」嘅田金雙，佢喺自己個博客話曼玉同Ole，仲有男方雙親，晚上會喺北京柏悅酒店聚餐，好可能喺平安夜前秘密訂婚，但記者噚晚去過酒店，就唔發覺有件咁嘅事。
冇再婚意欲
噚日馮仁昭即刻聯絡曼玉嘅助手Isabel求證，佢就話：「唔清楚喎，我家放緊假，喺香港，你最好問番放料嗰位田先生啦，我就冇聽過喇。」
查實曼玉都講過如果結婚一定會公開，不過佢對於再婚似乎意欲唔大：「我都結過，不會好想再結多一次，男友也沒結婚需要，若一天有感覺才會去結。」仲話當年同法國導演阿薩耶斯簽字結婚嗰陣，感覺好似簽生死狀咁，令佢怕怕，曼玉話：「反而不結婚，你認定了這個人，會好好去經營這段關係，讓它永遠是有可能的，但也沒有一定要永遠的壓力。」
之後本報記者到該餐廳守候，不過保安就話冇呢件事，睇嚟都係流料居多喇。
田金雙網址： http://blog.sina.com.cn/s/blog_4976408d0100g45c.html