泛民主派留守香港大本營為元旦大遊行做準備，「政制向前走大聯盟」唔搞遊行抗衡，建制派中人樂得清閒梗係雞飛狗走，金勞詹至「爽快」，早喺17號已抵達拉斯維加斯，懶理18號財委會審議高鐵撥款。
身在賭城嘅金勞詹同八方講，呢幾日手風一般，最多試過一日上落百幾萬美元，由於搏殺至下月初才返港，有賭未為輸，暫時未知勝負，當然希望發新年財滿載而歸啦。揚言同泛民「玩鋪勁」、一齊辭職去港島區撼公民黨陳淑莊嘅金勞詹，可能響應馬丁呼籲「停一停、諗一諗」，透露近日好多人勸佢何必同泛民鬥氣，略改口風，稱會否辭職等返港後從長計議都未遲。正所謂賭場得意，可能政壇失意，選民未必鍾意豪賭議員，難怪金勞詹要再諗諗。