花旗股市繼續推上，帶挈港股造好，其實噚日亞洲區股市，除咗休假嘅日股外，全面上升，咁全面嘅升勢，估計多數係年結前嘅櫥窗粉飾效應。
恒指升236點收市，報收21328，仲有冇得上？照計就可以繼續推高，不過成交好奀，唔好抱太大期望，地產股昨日終於開車，可以留意。
新地C輪18280：新地（016）昨收113.50元，升2.8%。股價升破短期下降軌，破腳穿頭利好，下禮拜一拍地，新地股價有機試120元，破位睇128元，可以諗吓隻C輪18280。
隻輪現價11.8仙，2010年9月20日到期，行使價125元，溢價20.5%，引伸波幅41.6%，有效槓桿4.4倍，正股升上128元，18280睇19.5仙，正股跌穿108元，就沽咗隻輪止蝕。
俊樺