o靚模鍾蕙芝（Lavina）同胡心諾（Rainbow）噚日喺柴灣影相，宣傳稍後喺亞洲遊戲展推出嘅一系列印咗佢哋性感相嘅產品，包括咕、毛巾、床單、被套同男士孖煙囱等。
Lavina同Rainbow以低胸睡衣look示人，現場預備咗張床，佢兩個一上床就熟練地擺出唔同甫士，完全唔理自己着到幾低胸都照趴可也，波濤洶湧。
為咗介紹條肖像孖煙囱，大會搵咗個赤裸上身嘅男模示範，唔知係咪Lavina同Rainbow性感得滯，搞到個男模好似有小小生理反應。
Lavina冇加墊
講到周秀娜一早已出咗個人形咕，佢哋擺明跟風，Lavina話：「唔一樣，我哋啲產品全部可以用得，喺傢俬舖有得買，有冇見過傢私舖有人形咕買？我哋嘅賣點係真材實料。」咁即係話周秀娜唔係真材實料？Lavina話：「我唔係咁意思，只係話我哋影呢輯相係冇加工過，冇加墊，身材真材實料。」Rainbow亦話：「唔可以比較，好似牛奶都唔可以同橙汁比。」佢仲話自己係牛奶，因為佢鍾意飲。
大毛巾包裸男
另外毛巾上有大大隻字「WetMe」，好似意識不良，Rainbow：「希望啲男仔冲完凉用條毛巾包住自己，咁就好似被啲男仔攬住自己，毛巾就吸晒身上嘅水。」遲啲佢哋又跟周秀娜咁落場送抱抱同kiss卡畀買嘅人，連宣傳招數都抄到足。