聖誕佳節，無論大人或小朋友，都鍾意喺呢個普天同慶嘅日子收到禮物，過一個開心嘅節日。剛上任曼城領隊職位嘅文仙尼，亦同樣希望拆禮物，但佢想要嘅嘢唔容易得到，就係下季嘅英超冠軍，同埋季尾打入前4嘞！
文仙尼周一正式以曼城領隊身份會見傳媒，以佢喺國際米蘭取得成功，嚟到曼城當然有鴻圖大計，而且中東老細搵得你返嚟頂替曉士，亦會有所要求；文仙尼亦好識做，訂下目標要奪得英超聯冠軍，而今季最少要打入前4，取得下屆歐聯參賽資格，氹吓老細開心。
下季贏英超大想頭
不過，要帶領曼城奪得英超聯，以佢哋嘅財力，要好似車路士咁組成一支可以奪冠嘅球隊絕對唔難，但文仙尼目標係球隊喺下個球季雄霸英超，我求大俠真係覺得佢有啲大想頭，你當曼聯、車路士、利物浦同阿仙奴冇料到o架！車路士班主阿巴莫域治都注資多年先有今日嘅成績，文仙尼想一季半就攞英超冠軍，未免癡人說夢話，用嚟老細就得，要真係做到，就困難重重。
至於文仙尼另一份想要嘅禮物係今季打入前4名，我求大俠覺得佢呢個目標難度都唔細，話晒佢哋同目前第4位嘅阿士東維拉相差6分，雖然話曼城目前係英超輸波最少球隊，但主要對手仲有熱刺，又要博Big4之一嘅利物浦下半季繼續沉淪，真係存在好多變數，如果佢話想參加下屆歐霸盃，我求大俠就覺得機會仲有，但歐聯囉喎，都係大想頭！
挽留有離心球員
講到球員，文仙尼雖然未定出下個月轉會市場重開後要買邊個球員，但一啲由前領隊曉士買返嚟嘅戰將就傳出想離隊，好似基雲同比拿美咁。對於文仙尼嚟講，留番今季表現唔錯嘅基雲應該利多於弊。至於比拿美，呢位曼城前鋒上半季表現唔差，雖則文帥未來計劃亦可能會羅致攻擊球員，但季中轉會市場好貨唔多，心急點會買到好嘢o架，既然手上有好球員，就應該留住佢，變成爭取好成績嘅重要棋子好過啦。