今屆重返立法會嘅民主黨黃成智最近學人搞「大茶飯」，榮升老闆之列，喺粉嶺牽晴間開咗間茶餐廳「家‧滋味」，以半社企形式運作，聘請區內青少年同婦女幫手，呢間餐廳並唔係成智獨資，係佢同多年好友兼民主黨新東支部秘書劉帶生夾份。
劉帶生做過沙田區議員，算黨內活躍分子，背景亦「雄厚」，原來係新界王、鄉議局主席劉皇發姪仔。呢段親戚關係鮮為人知，八方識佢多年亦未聽過，劉帶生話刻意低調，費事外界以為佢叨發叔嘅光。
呢間餐廳已經成為黨內唔少兄弟打躉地方，成智讀緊中六嘅囝囝文軒噚日都有大擦一餐。成智仲話如果長毛搵佢助選，自己除咗會幫佢企街嗌咪，絕對唔介意贊助埋佢助選團嘅餐飲費，長毛應該快快搵佢斟一斟。