出戰省港盃嘅香港隊噚日開操，準備下周二首回合賽事，而專程到九龍仔撐場嘅足總副主席貝鈞奇同董事周文亮，噚日觀操時傾開，都唔明點解主席梁孔德講到由新春盃頂替賀歲盃單料。
貝生噚日笑住話，從來都冇聽過用o靚仔踢嘅新春盃頂替賀歲盃，所以佢都想搵主席梁孔德了解吓，點解佢有呢個咁有諗頭嘅構思都唔單聲佢聽，等董事局研究。
至於有意捱義氣幫足總頂咗今屆賀歲波嚟做傑志，繼續努力聯絡球隊；但總領隊伍健同求大俠講，如果下個月5號前都未物色到有份量嘅球隊嚟香港賀歲，過年入場睇賀歲波傳統有可能保唔住。
講番噚日開操嘅港隊，陣中只有7個東亞運足球金牌成員，教練亦唔係金判坤，而係晨曦教練甄力健同司徒文俊；大家唔好因為唔係東亞運嗰隊就唔睇，甄力健就希望球迷入場，支持吓呢支年輕港隊踢好波。