話咁快2009年就過去，小甜甜龔如心單世紀爭產官司最快今個月底有結果。風水富豪哨牙通今日50大壽，八方問佢有乜生日願望，佢冇乜點講，相信輸贏已經心裏有數，只係透過發言人稱，會同家人到海外旅行慶祝牛一，暫時離開爭產戰場，過一個快樂聖誕。
哨牙通唔肯透露旅行目的地，話希望保持私隱，唔想傳媒追訪，而其對手龔仁心醫生卻冇假放，呢幾日仲好唔得閒，因為華懋集團要搬總部，正式離開盤踞廿幾年嘅尖東華懋廣場老巢，搬去小甜甜龔如心生前嘅心血結晶荃灣如心廣場，今個月28號正式喺如心廣場擇吉辦公。
華懋搬總部買新傢俬
華懋集團搬去荃灣，據講會佔用如心廣場低座35樓至38樓，包括龔醫生在內嘅一眾龔家成員亦會喺呢度返工；雖然龔家一向慳儉，但難得搬新竇，所以破例買新傢俬，唔會留用尖東啲舊傢俬咁寒酸。騰空嘅尖東華懋廣場頂樓會略為裝修，因為使用多年十分殘舊，之後會放租。
華懋尖東總部係哨牙通夜會小甜甜嘅地方，對於呢啲「韻事」，龔家真係唔睇都眼寃，宜得早走早着，不過大部份華懋老臣子對嗰處甚有感情，事關喺尖東返工廿幾年，視為第二個家，忽然要轉地頭，好多人都話好唔捨得。
隨住華懋總部西移，龔仁心亦有新動向，就係決定棄醫從商全職打理華懋業務，喺荃灣豪景花園嘅診所做埋聽日平安夜就光榮結業，不過生意做到最後一刻，仲有叫街坊打流感針；一直喺診所做護士幫佢手嘅老婆劉元春亦會投入華懋，擔任人力資源部主管。
舊街坊唔捨得龔仁心
龔仁心在豪景花園行醫廿幾年，有街坊話個仔由細俾佢睇病睇到大，雖然只係睇吓傷風咳，但睇開有感情，第二時個仔有病唔知點算，要去到深井睇醫生。據稱龔仁心都不太捨得舊街坊，話日後有機會一定會回歸敍舊，其實豪景同如心廣場距離唔係好遠，街坊行開行埋，去荃灣搵龔醫生都好方便。
mailto:[email protected]