星期日黃昏，睇完電視新聞就想睇電影，但係now嘅英文電影冇套戲好睇，拎住遙控㩒吓㩒吓，好似去到134中國電影台，見到基辛格幾十年前嘅樣子，於是睇多一陣，原來係一九七一年基辛格詐肚痛秘密訪華嘅紀錄片，幾有歷史趣味噃，於是一路睇到尾。呢套戲由中國拍攝，訪問當時有份參與其事嘅人物如章文晉、冀朝鑄、黃華、基辛格、洛德等等。
基辛格於一九七一年七月秘密訪問北京，住在釣魚台五號樓，訪問前一年，中美雙方已經秘密策劃其事：基辛格橫越太平洋，去咗西貢、新德里之後，就到咗巴基斯坦首都拉瓦爾品第，基辛格話沿途嘅訪問，故意安排好多悶場，佢對隨行記者大打官腔，講來講去三幅被，悶到啲美國記者抽筋，去到巴基斯坦之時，只剩番一名記者死跟，過咗兩日，佢就話病咗，巴基斯坦政府安排佢去山上一間別墅休養。次日凌晨四點半就與三位隨員（包括洛德）、兩位特工秘密登上巴基斯坦航空公司飛機，機內已有中方人員迎接，直飛北京南苑軍事機場，由葉劍英接機。周恩來歡迎美方訪華嘅口訊係由巴基斯坦政府傳遞嘅，巴美緊密合作，所以基辛格由巴基斯坦出發。基辛格登機之時戴住一頂大帽，戴上墨鏡，黑夜之下，顯得好滑稽，原來基辛格行色匆忙，唔記得多帶一件恤衫，翌日見周恩來之時，要借隨員一件恤衫着，扁晒嘴，因為佢心知會面照片一旦發放，必然轟動全世界，佔晒頭版，佢唔想自己件恤衫唔靚也！
一九七一年基辛格秘密訪華，開展中美二次大戰後關係新一章，到咗二○○九年十二月哥本哈根氣候峯會，中國居然可以向美國示威，溫家寶總理派手下出席會議，令在場嘅奧巴馬總統為之氣結，直接親自去搵溫總；你話三十八年之間，中國從閉關自守到活躍國際，變化之大，實在難以想像，如果江青未死，睇見呢幕，不知有何感想。高志森與焦媛推出一套話劇《江青和她的丈夫們》，相信一定冇江青最後一位丈夫見基辛格嘅環節。一九七一年基辛格訪華之時，江青與文革小組佔據一半釣魚台為辦公住所，毛澤東晚晚由章文晉陪住食飯，成件事瞞住江青，可以想像，當時毛江之間已有裂痕。