曼徹斯特天空一片迷濛，當同市宿敵曼城「變天」，曼聯喺同日亦遭逢大敗，慘吞富咸3蛋。換轉係平時，大家一定聽到費爵爺咆哮，奇就奇在佢今次出奇咁平靜，仲陶傑上身展露文采，整句「此時此刻，隧道盡頭漆黑一片。」曼聯嘅景況係咪佢講到咁悲？我唔知，只記得費Sir喺舊年年尾意氣風發，今年就差得遠嘞。
防線傷7件 隊醫開OT
「毫無疑問，只有班後防傷兵盡快好番，我哋至可以重納爭標正軌。」費Sir咁講絕對有道理，卡域克、費查再搭迪拿特……，如果我話前日曼聯排嘅後防陣，係佢哋自英超成立至今最唔完整，應該冇人反對；換轉係平時里奧費迪南、尼曼查維迪等支柱在陣，富咸嘅梅菲、森莫亞、杜夫邊會咁容易也文也武？班主場球迷又點可以領先3球情況下高呼「第4球！第4球」？幫費Sir計一計，紅魔暫時有7個後防傷兵，唔怪得佢話班隊醫要開晒OT，希望盡快搞掂傷兵問題。
除咗後防陣殘，查實中前場球員喺前日場波都乏善足陳，好似奧雲同英聯盃福將吉遜下半場中後段仲被換走，表現擺明唔合格。我求大俠前日同個口痕佬一齊睇波，佢就特別批評老將史高斯，話佢近況同啱啱攞到今年全英體壇風雲人物嘅同輩傑斯差天共地。個口痕佬仲好心水清，提到傑斯剛獲續約，史高斯就冇份，唔通真係咁影響到佢心情，影響埋佢表現？
上年威水到叫C朗放假
前日場波係曼聯今季英超第5場敗仗，輸波場數已經多過上個球季一整季（4場），而同前季全季一樣，費Sir心情唔好可想而知。記得舊年聖誕前後，費Sir心情大靚，夠膽死叫傑斯同埋當時仲在陣嘅蒲霸基斯坦奴朗拿度（C朗）假日玩得開心啲，今時今日就算佳節當前，我諗曼聯陣營都冇人敢提個玩字囉。