基金經理提早放假，大市有跌幅但冇成交，買賣兩閒。見到按揭證券公司前高層兼專欄作家李永權，佢笑言技術分析陷阱處處，年少氣盛時雖曾對此着迷，但一朝被蛇咬，發覺基本分析加中線投資更勝天天按圖索驥。
傳統技術分析的確反映大市極度樣衰，11月27日杜拜事件爆發，恒指瞬即跌穿9月以來嘅上升軌後彈番上去，呢次跌穿上升軌，技術上留意21000三底有冇得彈。不過，盡信圖不如冇圖，牛證好友已陸續扯白旗，或轉倉再博過，搬倉搬到落20300至20800點先收回，反映好友節節敗退，要是餓狼出動，食埋20800呢批熊掌，條街已冇乜可愛小雲尼，應可Reset再嚟過。
市底弱過藥煲，各大媒體一致認為係美金反彈，導至資金外流。首先最唔明係，明明港元同美元掛鈎，理應一齊升、一齊跌，何解美元值錢咗，就會多咗人沽港元套利？銀行界朋友話，港滙係轉弱，但冇市場講得咁誇張，銀行水頭仍滿瀉。
大行推低 洗牌玩過
較近磅嘅解釋係基金提早收爐派花紅，加上美資大行要還畀政府嘅錢已炒夠數，仲使乜搏命。將個市推低啲洗牌玩過，下年追數亦唔使咁辛苦。
你實會問仲要跌幾耐，坊間又係話睇吓美元升幾耐。近期一直撐美金嘅商品天王羅杰斯，雖有多次「今天的我打倒昨日的我」前科，但佢近期買多咗美金；債券大王格羅斯亦大手增持現金比重，到雷曼出事後新高水平，可見兩個人一條心唱好美金。大行同唱和，睇美滙指數有機上番80，直頭要升穿下降軌再展升浪咁話，由此引伸出流入新興市場資金少一成，真係斷估冇辛苦，借問聲呢個數點計出嚟？全世界家有邊個地方有高增長、資金自出自入，仲有百分百存款保障？內地水源唔通忽然又冇晒？
大行話擔心套息交易拆倉，但早一星期先至話個市有機會同美元同步向上，到底邊句真？一句講晒，經紀要開飯，並不反映個人意見。以上純係分析市場動態，並無任何推介之動機，以免有心人又再大造文章，輸打贏要撈政治油水。
胡孟青