中文大學博文講座教授、晨興書院院長SirJamesMirrlees係諾貝爾獎經濟學獎得主，與另一位經濟學家I.M.D.Little寫過一本小書，名為ProjectAppraisalandPlanning，在上世紀七十年代初由OECD出版，到咗一九九一年，寫多一篇續篇：TwentyYearsOn。呢本係研究院課本，亦係公共建設項目規劃之必讀參考書，在今時今日嘅香港，如果要搵一位經濟學家分析公共建設項目之社會成本效益（socialcostbenefitanalysis），相信最權威嗰位就係SirJames。最近睇到興建高鐵引起咁多爭論，不禁想起佢，唔知以後政府推動大型項目之前，會唔會先請SirJames為政府規劃官員，為立法會議員開一個訓練班。當然，上完堂之後，大家可能為咗不同政見，繼續鬧交，但起碼鬧交之時，識得唔好將一九九○年代初之價格與今天之價格相提並論先。今天之六百六十九億元，等於一九九三年幾多億？要慢慢計清楚先至敢講，如以樓價而論，一九九三年左丁山睇樓，豪宅價係四千元一呎左右，今天係萬五至二萬元，嗰陣時唔買，注定左丁山以後冇資格住中半山。以此粗略伸算，今天之669億可以買到一九九三年之168億元住宅。
高鐵建造費急升，皆因拖延時日之故，如果在二○○三年拍板，二○一二年落成嘅話，造價一定便宜好多。明年適值全世界之基建（政府救市也）進入高峯期，好彩杜拜瓜咗啫，否則建築物料更加貴。再拖多一年都唔上馬嘅話，高鐵造價會突破一百億美元都唔奇。試吓問啲大學校長，○九年招標興建新大樓、新宿舍，投標價比預計高咗幾多成吖！
興建高鐵如不用在地底而在地面上，費用必然可以大大降低，但在地面上建高鐵，反對聲音更大更多，恐怕過不了環境評估。一九七幾年時興建九龍地鐵，用明挖方式，掘起半邊彌敦道，交通擠塞不堪，係今日不可想像之事，中文大學在地底興建圖書館，都唔可以明挖啦，故此成本大增。興建高鐵合符香港長遠整體利益，正如在七十年代後期興建地鐵（當年有位羅德丞議員反對），越快落成越好。