亞視早排忽然發難，高層出面力數無綫「五宗罪」，指TVB禁止藝人亮相其他台、招攬「獨家」廣告等做法係壟斷行為，要求廣管局調查。老實講，所謂「五宗罪」都係老生常談，TVB中人同八方講，思疑有人想轉移視線，避免港府介入股東爭拗。
TVB中人又指，亞視有權向當局投訴，但唔應該乜都入晒無綫數，好似收視率調查機制，係兩台同廣告商會按既定機制做，亞視認為機制唔公道，可以喺三方會議上提出反建議，呢方面同廣管局冇乜關係，亦唔到無綫話事。據知現時調查收視率嘅公司CSM合約明年底夠期，明年中應會就新合約公開招標，亞視屆時可提出修訂調查方法，有機會報仇。