鬍鬚曾嘅網誌每個星期日都會更新一次，噚日嘅最新內容係教大家整火雞。佢話，以前喺美國生活嘅時候，都會趁感恩節同屋企人聚首一堂，晚餐嘅主菜焗火雞更係佢嘅拿手好戲。美國人傳統上會喺火雞腔釀啲栗子、豆、麪包同芹菜之類，但鬍鬚曾當年就自創喺雞腔填滿中式臘味糯米飯，仲話喺異鄉生活嘅中國人咬落嗰啖糯米飯度，即刻勾起濃濃嘅鄉懷咁話。
鬍鬚曾話，自從加入政府之後，已經好少下廚，但上個月底一時技癢，請咗幾位好朋友返屋企享受一頓感恩節晚餐，自然唔少得拎嗰味「臘味糯米飯火雞」出來宴客，班朋友仲食到津津有味。佢仲特別強調，雖然呢餐飯其實係由家中廚師炮製，但佢都有喺旁邊指指點點喎。