股海老手每逢見大市氣氛晦暗不明或淡風猛吹，卻又股癮起時要搵股炒，多數會揀新股為入市對象。
點解要揀新股？因為新股或半新股剛剛上市，冇包袱之餘，個底清白，有時升跌可以唔跟市況，如果貨源歸邊，幕後人想點做都得。其實市場上每日都有唔少人要搵股票炒，只要隻股氣氛一到，躍躍欲試去炒嘅人肯定唔少，咁樣股價就有機會同跌市分道揚鑣。
近期最火熱的半新股，三一國際（631）都算係箇中表表者。三一上市招股時，市場已有睇法認為係一眾新股中之「黑馬」，果然真係跑出，上市以來股價向好，最高曾升見9.80元。
三一國際業務具一定賣點，集團主營煤炭機械設備研發與產銷，亦係內地最大採掘機製造商。近年內地銳意整頓不合格煤炭企業，合格煤場均轉用較先進開採方法，行業趨勢惠及三一。
三一上周五逆市升4.1%，收報9.12元，短線有機會挑戰9.80元高位。此外，如不想高追，該股在10日線（現於8.53元）有不俗支持，可候回吐買入，目標先定10元，跌穿7.50元止蝕。
方星俠