50歲生命鬥士羅君左（斌仔），面對兩度截肢也不曾氣餒。昨日，他獲院方批准請假外出，換上中山裝自行推着輪椅登上沙田大會堂的舞台，為歌唱活動擔任司儀，以行動證明失去一條腿並非失去全世界。斌仔並勉勵大家珍惜生命，博得全場過千觀眾如雷掌聲。
羅君左今年9月因糖尿病影響而切除右腳半截小腿，由於傷口不能癒合，為保命斌仔惟有忍痛切除僅餘的半截小腿。儘管兩度截肢，斌仔不但未氣餒，且更有無比勇氣繼續好好生活下去，跟病魔抗戰到底。由於斌仔康復情況理想，醫生昨日特批准他請假7小時出外，為沙田大會堂舉行的「超新聲歌唱大賽2009」擔任司儀，一圓斌仔再踏舞台心願。
收花遇蝦碌即時執生
比賽於昨晚8時開始，換上中山裝的斌仔，自行推着輪椅出場，然後跟現場過千觀眾說：「好緊張，唔知大家對我接受程度有幾高呢？」全場報以熱烈掌聲以示支持，令斌仔大感鼓舞說：「希望畀到大家一個滿意嘅晚上。」之後大會派一女士上台獻花，沒料到花束勾住女士裙子，場面有點尷尬，斌仔見狀遂即時執生打圓場說：「佢好似唔捨得畀紮花我喎，咁紮花又的確好靚嘅。」
一直堅持要親自到場演出的斌仔，對全場觀眾支持感到十分鼓舞，他更勉勵大家說：「好開心能夠重踏舞台，希望大家能夠畀我影響到，生命影響生命，做人更加堅強、更加懂得珍惜，千祈唔好浪費自己嘅生命。」說罷全場掌聲雷動，場面感人。
傷口癒合隨時裝義肢
原來，前日醫生為斌仔進行例行身體檢查時，發現他血糖偏高，打算不批准斌仔請假出外，斌仔在醫院出發往沙田時，向記者透露：「醫生一早應承咗我，我又應承咗人，做嘢要講承諾，好在最後我情況良好，醫生都肯批准，不過佢都有千叮萬囑我唔好咁夜返。前日（18日）我見過我新嘅好朋友，即係我嘅義肢，傷口埋晒，家視乎我嘅狀態，隨時可以裝得。」
斌仔昨日下午5時許由友人阿Sam接載離開九龍醫院，他一手捉住車上手挽，然後雙手一撐便登上乘客位，完全毋須他人幫忙。抵達沙田大會堂後，斌仔忍不住跟記者開玩笑說：「好似放監咁，困咗喺醫院好耐，好耐冇見過高樓大廈。」
「好多嘢想講怕唔記得」
斌仔在工作人員引領下往後台化妝間做準備，並一邊化妝一邊跟另外兩位大會司儀對稿，表現跟往時一樣純熟。不過斌仔再接受記者訪問時坦言：「如果話我唔緊張都係呃大家，我個腦諗咗好多嘢想講，好怕上到台唔記得。不過，能夠重新踏上舞台工作，係我好期待嘅事，自己好興奮，希望下次踏上舞台係同我新朋友一齊，即係我嘅義肢。嚟緊我都要學行，好似BB仔咁。我嘅新朋友好重，比自己隻腳仲重。」
斌仔續說：「之前喺醫院見到個截肢嘅人仕捧住頭盔，以為截肢之後重可以揸電單車，原來佢係因為揸電單車冇咗隻腳。我想告誡大家，真係要小心好好保護自己雙腳。」
採訪：張俊銘 攝影：葉君海
抗病實錄：屢次死裏逃生
患有先天性糖尿病的羅君左，近年一直飽受心臟病及腎炎煎熬，但他仍樂觀及堅強面對，絕對是生命鬥士。去年他被驗出大動脈長了瘤，臉部和雙手有很多傷痕，需服藥治療。今年9月初，他的右腳腳趾長了一個大瘡，後來變成爛肉，原本只需切掉第二、三隻腳趾，但由於細菌感染速度太快，被迫切除半截右小腿。可惜斌仔因糖尿病影響傷口不能癒合，早前醫生再將其右小腿完全割去。
好友到場打氣
羅君左昨晚再登舞台，好友林偉、莫鎮賢和唐韋琪不但專程到場為他打氣，且更一早到後台為他打點。莫鎮賢說：「識咗斌仔20年，以前大家同梅姐（梅艷芳）好熟，好多時一齊登台。之前佢入醫院，我同唐韋琪負責煲湯畀佢飲。佢份人好正直好勇敢、意志好堅定。我知佢好想做番啲嘢回饋社會，以身作則，所以作為朋友我會支持佢。」
唐韋琪則說：「斌仔好有鬥志，有時佢好唔開心都會打電話畀我，同我傾偈分享。雖然我唔知幫到佢啲乜嘢，但就畀人知道佢係一個好勇敢嘅人。」
現場人士也對斌仔的現身十分感動，參賽者Annie表示：「我覺得斌仔個人好正面，雖然我覺得佢好慘，但佢竟然反過嚟講說話安慰番我。」
採訪：張俊銘 攝影：葉君海
