早前被踢爆同近日人氣爆燈嘅足球員陳肇麒（陳七）秘密拍拖嘅o靚妹李綺雯、近日被男方拋棄，陳七重回正印女朋友Natalie身邊，噚日o靚妹在事件後首次正式公開亮相到元朗出席活動，同場仲有同陶喆啜爆嘅岑潔儀（Zoey）。
「唔識做花邊嘢」
不過o靚妹出席活動時就俾大會玩，大會送個足球畀o靚妹，另外就送陶喆嘅CD畀Zoey，但係兩人有唔同反應，o靚妹見到個足球木無表情又死都唔肯掂個波，最後索性踢畀個妹妹，而Zoey就笑笑口接受啦。
問到o靚妹係咪好唔想掂個足球？佢冷笑咁話：「吓，足球唔係攞嚟踢嘅咩？我嚟到先知有呢份禮物，但冇所謂，玩吓啫。」講到Natalie喺facebook自稱陳太宣示主權，o靚妹又係好冷淡咁講：「咁又點，過去就過去，啲報道我冇留意。」有冇再同陳七聯絡？o靚妹重申：「分手就係分手，我同佢總之唔係敵人啦。我個人唔識做好多花邊嘢，只係識低頭工作。」
Zoey被鬧狐狸精
Zoey就大方話會買兩張飛去睇陶喆演唱會，但聖誕party就冇預佢。Zoey話自己冇同陶喆聯絡，但就被不明電話性騷擾同喺blog度俾人話佢搶人老公。
而陳七日前接受港台《舊日的足跡》訪問，講到成為娛樂新聞人物，陳七話好唔習慣，佢話：「我希望集中番喺體育版，我同女朋友上次見到有人衝出嚟影相都有啲驚。」主持人叫陳七拍拖應專一，他即哈哈大笑：「一定一定一定。」不過陳七表示暫時未打算結婚，要專注事業。
