聖誕節又殺到埋身，出得去玩，總唔想失禮，自己梗係要扮得型仔啲，不過有無諗過為自己打扮一下之餘，都可以幫你部愛車DressUp，歌手范萱蔚就帶埋一班專做花車設計嘅設計師，教大家DIY聖誕車。聖誕節揸佢出街，應節之餘，一定幫你搶唔少鏡，隨時得女朋友開心，禮物都慳番。
記者：趙慧敏
攝影：林栢鈞
Model：范萱蔚（Percy）
鳴謝：Boss
車身披雪花
雖然范萱蔚現時仍是無車階級，不過已排期考牌，準備進軍車主之列，對打扮座駕，她顯得興致勃勃。至於今次裝扮主題——聖誕老人甲蟲車，第一步要由車身開始，先將剪裁合適嘅毛毛布蓋在車頭冚上，將布尾攝入車頭冚內夾住，就毋須使用膠紙。尾廂亦同樣可蓋上毛毛布，車旁柱位則用膠紙貼上剪成條狀嘅毛毛布，再在車身貼些發泡膠雪花增加聖誕Feel！最後在車尾冚上貼番句「MerryChristmas」給大家一個祝福。
多毛車廂
跟着到車廂啦！先在車頭位置鋪上長毛嘅毛毛布，軟綿綿，係女仔見到都有攬埋去嘅衝動。布面則可放松果等聖誕飾物。玩激啲，連軚環都包埋紅色毛毛布，不過記得要貼緊啲，千祈咪影響駕駛呀！未夠，想再Cute啲？仲有計！喺座椅嘅頭枕位置戴番頂帽，後面放埋啲禮物盒（或者真禮物）仲唔夠晒氣氛？
四輪踏雪
車胎都唔可以漏，「白色聖誕」就梗係搞到一轆都係雪啦！胎軨位置最啱貼巨型雪花，輪胎就用噴雪劑噴上假雪，似足四輪在白雪上飛馳。最後要「點睛」喇，扮聖誕老人，點少得一頂聖誕帽！設計師諗到將個特大聖誕帽塞滿布碎，再以單車輪胎固定形狀，放喺車頂，聖誕車咁就完成！不過大家記住，呢類大型裝飾只可以喺停車時影相用，行車時就千祈唔好擺上去，甩掉會造成危險哩。
扮靚材料
工具
基本工具只需剪布鉸剪及雙面膠紙，但膠紙要小心選擇，切忌黏性太強，否則可能令車身面漆受損。可選一般文具店都有售嘅地墊膠布，黏性夠強之餘，亦容易撕走。
毛毛
布料
白色長毛布料1碼及紅色短毛布料3碼。車身用短毛料粉飾便可，約$50一碼，而粉飾車廂嘅長毛布料則要$90一碼，深水埗嘅布料批發店有售。
聖誕
飾物
松果、雪花等飾物可按自己喜好購買，一般十幾蚊都有交易。而今日呢架聖誕車，布料連飾物嘅費用大概就用咗300蚊左右。
唔想動手？有計！
想揸住架咁可愛嘅聖誕車同女朋友周圍去，不過又無時間自己動手？得！租車連幫部車扮埋靚靚收費1萬蚊起，齋扮靚嘅話價錢就要面議啦。其實今次炮製呢部聖誕車嘅設計師強項係結婚花車設計，想有部出位結婚花車，佢哋都好有計。
查詢：Boss（66000434）
網址： http://www.bpcarrental.com