個個打工仔都話時勢好艱難，係咁呻工作辛苦，之不過做老闆嘅亦唔好得好多。好似重返上海做咗上海大鯊魚老闆嘅「中國巨龍」姚明，就係一個好例子。腳傷未癒嘅佢為咗搞好隊波，唔理會否影響傷患，專程回國喺上周六親身支持上海大鯊魚對浙江廣廈嘅CBA揭幕戰，希望用自己嘅吸引力，重新挽救沉淪咗7年嘅上海大鯊魚。
姚明嘅苦心暫時都未算白費，上海源深體育中心嘅5,000張門票喺5個鐘內就賣哂，仲吸引咗超過160名記者採訪賽事，上海副市長趙雯、「桌球神童」丁俊暉都有撐場，搞到球場內星光熠熠，姚明亦睇到手舞足蹈；不過最可惜嘅係上海大鯊魚加時後以101:102敗陣，對手浙江廣夏嘅台灣球員「野獸」林志傑仲狂轟17分，浪費晒姚明嘅一番心機！