寫《沙龍》這份歌詞時以為自己為民喉，用文字捕捉了時代的風景──逢假期外出每5個男人就有1個心口陀着部單鏡反光機（對，我想捕捉的「風景」就是許多人在捕捉風景）──結果反應一般，那20%男性人口的鐵票沒有順利落袋，「對焦她的愛……」沒有成為全港龍友的國歌，outfo咗！
是我抵死，所以有報應，全首我最喜歡的那句歌詞「音樂話劇詩詞和舞蹈揉合生命千樣好」（估唔到係呢句呢？）居然數漏了時裝，大概是HelmutNewton在天之靈懲罰我的。
我不敢說「如果這個世界沒有了時裝」只得山水貓狗和BB，影相機將會賣少幾多部。
我只敢反方向思考：人為甚麼想「扮靚」？「時裝是為了甚麼而存在的」？答案大概很明顯是「觀眾」和「相機」吧？
不如說，如果沒有「沙龍」可拍，你到底會買少幾多衫？
YES!城市驚喜
如果你都自命「時裝精」，不要告訴我中學時代你沒有做過這樣的事：
找個有相機又肯俾你搵笨的男同學，約一天自備10套靚衫，在花園或街邊或家中一道白牆前，擺晒甫士扮自己影緊時裝雜誌入面的styling相！
那個年代，甚至有種分類小廣告，專門推銷私人的沙龍攝影：約個攝影師星期六中午12點喺兵頭花園噴水池等，三嚿水包4款造型照4張大相36張細相……有買過《YES!》雜誌的人就算冇做過都一定心動過。
對，作為一名少女，如果不幫襯一次這種「留倩影」服務，下一次有機會化行妝set好頭着晒靚衫名正言順地換7個造型影輯相，可能就要等結婚那一次了……如果你嫁得出的話。
又，除非你咁啱識到個識影相嘅男友啦，咁你都仲有機會喺拍拖初期扮幾次KateMoss，不過如果咁啱你那位「識影相嘅男朋友」，最鍾意影的你是不包含衣服的，咁你就命苦啲囉。
MyFashionMoment
記得那個沈嘉偉問我「點樣可以令更多人捨得買更多衫？」的故事嗎，當時我的答案是「搞個最snobbish着得唔靚唔畀入場的club。」
原來不是最高招。
更簡單更有效的方法其實是，鼓吹blog上的LookofTheDay便可。
是，在我阿爸阿媽那一代，「扮靚」是要有理由的，通常是「飲」、「拜年」和「去party」，除此之外，要「有相影的」才值得「嘥套衫」，尤其是以前菲林珍貴，你扮靚啲我才按快門，才算得上互相不辜負，現在拍照太方便太容易甚至太濫了，反而令人更疲於奔命時時在備戰狀態，因為不知何時要「被拍」，所以日日都要扮到好靚才出街，就算沒人要影那一天，自拍也方便呀。
不如乾脆搞㷫這種「每日一相」的造型上載熱潮，寫圖片日記，靚那一日又影，唔靚那一日都要影，信我，如果真的實行，就會唔知點解日日都好靚而好少唔靚的了。
以前有人問我我的FashionMoment是那一刻，我通常答不出，因為想來想去想不起有；現在問我同一條問題我也答不出，是因為太多了，我簡直就沒有離開過FashionMoment半秒鐘，不如問我Non-FashionMoment反而仲容易。
沙龍時裝
如果我連心口孭住個手機到底襯唔襯衫都介意，更大份更覺得的camera當然不會從輕發落，即使我不能發明一種更有型的相機外殼，至少也讓我研究出幾款和長短炮都配的造型吧。
又或者說，如果我想成為未來最紅的男設計師，一手創造下一波的Visvim，我一定會從「預咗孭相機」這個前提入手。
如果我想成為未來最紅的女裝設計師呢？我估我會主力研究最靚的相機袋，Itcamerabag，而且要快，否則下個月你就發現市面有菱格金鏈的、竹柄孖G的、monogram的，或以任何一位女星命名的「相機手袋」賣，便太遲。
又或者，你可反守為攻，改行離開時裝界，轉field到AV業發明一些女性愛用的相機款式，可能發達得更快。
不，想深一層，唔work的，因為沒有女性會自己買相機，女人的相機通常都是男友或老公送的，那個他們明明自己想要，又夾硬話買嚟送畀你，結果你話唔識用，佢哋便自己用番（又當送咗嘢畀你）的極品單鏡反光機。
對，男人都是這樣的，所以今年聖誕，記得買番個2.55畀佢哋做禮物呀！
本周禮物
我，16歲，扮時裝相兩枚，畀你笑飽佢，當聖誕禮物。
Textby黃偉文
mailto:[email protected]
本欄逢星期日刊出
