呢幾日澳門認真熱鬧，處處係恭迎國家領導人嘅旗海，不過被稱為「澳門長毛」嘅激進派街頭鬥士利健潤卻失場。去年澳門回歸九周年，香港民主派闖澳被拒入境，利健潤曾到場聲援，今年則冇現身。
據其親密戰友講，利健潤噚日來港，並非自由行，而係因為留喺澳門成為執法機關跟蹤目標，連家人都受牽連，為免親友受滋擾，佢無奈行開幾日避靜，聽日會到台灣，向訪台嘅海協會長陳雲林抗議。
有傳聞指利健潤係獲「邀請」到台灣玩幾日，令澳門社會氣氛更和諧。據講今年1月國家副主席習近平訪澳，利健潤去咗馬來西亞；五．一勞動節遊行，則聲稱獲邀到台灣交流，成日唔喺澳門，好似變成離岸反對派。