闊別紅館11年的鄭伊健前晚再踏上舞台舉行演唱會，大批圈中好友現身捧場，近年屢傳與他感情不穩的女友蒙嘉慧（YoYo）全程在台下打氣，而好拍檔舒淇則擔任嘉賓與伊健台上纏綿，兩人還輕輕一吻，未知YoYo會否打翻醋埕，尾聲伊健一頭濕髮現身時呈現M字額，露出中年危機。
一連兩場的《鄭伊健友情歲月09演唱會》前晚在紅館開鑼，全場爆滿，伊健一向人緣甚佳，當晚不少圈中好友現身捧場，其中女友蒙嘉慧更坐足全場為他打氣。相隔11年伊健再踏紅館舞台，他似是有感而發說：「轉眼就十幾年，換畫都換咗幾次，你哋拍手係咪即代表家同隔籬嗰個係最開心。」不知是否他的真心剖白?!
跳勁舞論盡
當晚伊健換上多套靚衫出場，但相當密實，就連擔任嘉賓的性感尤物舒淇也包到冚，為伊健演唱《情路狂奔》時伴舞，兩人更大跳貼身舞，互相依偎，不知是否因為女友YoYo在場怕她打翻醋埕，故此伊健和舒淇最親密都只是輕輕一吻，錫完後兩人立即彈開，之後舒淇便落台，伊健說：「我都要多謝導演劉偉強，因為佢放舒淇假，佢先可以喺拍戲時候抽時間嚟幫我演出。」伊健當晚也有大跳勁舞，但當他企在男舞蹈員背脊上時卻有點論盡，幸好未有跌下來大出洋相。此外伊健又唱出師傅羅文的《前程錦繡》。
現M額危機
約11點完騷，雖然伊健已返回後台兼且紅館廣播請觀眾離場，但現場有觀眾仍不肯離開大叫安哥，接着伊健濕着頭換上凸點白低胸Tee及黑褲現身，他說：「我出嚟諗住同大家講拜拜，真係唱晒啲歌，冇排過其他歌啦。」但幾經fans要求，最後伊健和現場觀眾一同合唱《一對對》，但見伊健梳起前額頭髮，M字額相當明顯，露出中年男士危機。
採訪：馬建華
攝影：黃偉雄
