富豪產業信託（1881）保守息率回報超過10厘，防風力特強，係時候睇位兜轉。富豪產業09年半年度（6月底止）每基金單位派息8.5仙，齋計中期派息，已經超過5厘。要咁睇，今年下半年經濟市道比上半年度好，流感對民生影響又冇估計咁大，加埋今年「十．一」長假效應，富豪產業下半年度業績，應該比上半年度仲好。係咁意計數，09年末期每基金單位派息同中期息睇齊，富豪產業息率回報已經挨近11厘，食息都已經夠和味。
再講，富豪產業最新NAV折讓又上到45%，未有耐爆標，防守力進一步加強。呢轉睇實1.50元橫行位兜轉，又博富豪產業升40%，到2.10元，到時富豪產業嘅息率回報，仲講緊高達8厘。有咁嘅息率，真係冇有好怕。
科聯燒冷灶博升20%
科聯系統（046）今年6月底手頭現金1.77億銀，兼無銀貸。據集團中期報告講，隨住未償還款項回籠，手頭現金超出08年底（2.28億銀）10%，財政狀況上佳。又科聯09年半年度（6月底止）每股派息4仙，又係好保守計數，末期息同中期息睇齊，全年派息8仙，科聯息率6厘樓上。呢轉燒冷灶，吼住1.25元兜底，博升20%到1.50元，科聯預期PE都係10倍水位。
錢雋