2009年網絡繼續大爆炸，每天都有奇人奇事，衍生一連串潮流術語，其中由娛樂界炒熱的更是多不勝數，入侵不同層面，就連曾特首都開口埋口要升呢，香港人又點可以唔跟住學潮語先。本報娛樂版roundup今年最常用（或濫用）的潮語，供大家溫故知新，準備升呢未？
撰文：蘇芬妮
o靚模系列
─【乳模】/【胸模】─
均解作以激凸上圍殺入模特兒界的女model。
濫用指數：2
例句：瑤瑤進軍香港，令一班本地乳模騰騰震！
─【反o靚模】─
反對o靚模的團體。
濫用指數：3
例句：我係反o靚模，不過你送攬枕畀我嘅話，我冇理由唔要。
─【反反o靚模】─
反對反o靚模團體。
濫用指數：1
例句：反反o靚模聯盟係幫o靚模平反，唔係為反而反。
─【Sing模】─
轉型唱歌的o靚模。
濫用指數：2
例句：你唱歌咁叻，做唔到o靚模都仲可以做Sing模喎！
─【飛甩o靚模】─
放棄錄用o靚模。
濫用指數：3
例句：電視台為整頓風氣，已頒令飛甩o靚模。
─【潮模】─
自以為很潮的o靚模，亦可解作來自潮州的o靚模，最佳例子是周秀娜。
濫用指數：3
例句：睇你呢身打扮，都係咪學人扮潮模嘞。
─【模Art】─
從事演藝的o靚模，出自金句王黎明的傑作，自恃「模」與倫比，實則冇分別。
濫用指數：3
例句：例句：我又唱歌又拍戲，我係模Art唔係o靚模囉唔該！
劇集角色系列
─【啦fing哥】─
謝天華在《學警狙擊》的角色名稱，亦可引伸解作卧底。
濫用指數：4
例句：唔使扮嘢啦，我一早睇穿你係啦fing哥！
─【79】─
柴九的音譯，黎耀祥在《巾幗梟雄》的角色名稱。
濫用指數：2
例句：79話齋，人生有幾多個10年吖，及時行樂最緊要。
─【499】─
四奶奶的音譯，鄧萃雯在《巾幗梟雄》的角色名稱，網上通行。
濫用指數：3
例句：好嘢，499終於攞到視后，可喜可賀！
─【3好】─
佘詩曼在《宮心計》的角色名稱，亦是「說好話，做好事，存好心」的縮寫。
濫用指數：2
例句：阿B個男友係就係3好，弊在冇錢、冇車、冇樓，都係嫁唔過。
現實人物系列
─【法拉之亂】─
陳法拉在《有營煮婦》中脫剩Bra，史稱「法拉之亂」，現泛指陳法拉有性感演出。
濫用指數：2
例句：有冇睇電視，又嚟法拉之亂呀！
─【偷芒】─
原指城城與Mango的緋聞，現可解作逢場作興。
濫用指數：3
例句：做乜成個熊貓咁樣，噚晚又去偷芒呀？
─【廁格】─
「廁田」側田和曹格的streetfight。
濫用指數：2
例句：近年最轟動嘅街頭打鬥事件，非廁格大戰莫屬。
─【LadyGaGaism】─
崇尚美國妖姬LadyGaGa主義。
濫用指數：3
例句：唔好同我講乜嘢資本主義、共產主義，我家淨係沉迷LadyGaGaism
其他類別
─【屎上最強】─
傅穎的全走音版《花吃了這女孩》出街後，被網民嘲笑低處未算低。
濫用指數：4
例句：佢打機都可以輸畀電腦10:0，真係屎上最強呀！
─【CCTVB】─
TVB自我審查，被戲稱是中央電視台（CCTV）的B台。
濫用指數：5
例句：個個台都冇嘢好睇，我熄機都唔睇CCTVB。
─【才女】─
暗諷懶醒兼欠才學的女子。
濫用指數：3
例句：佢做嘢打爛嘢之餘仲要懶醒，正一才女嚟。
─【升呢】─
等級提升。不過自從被特首騎劫後，開始令人生厭。
濫用指數：5
例句：陳七由熱刺特訓返港升晒呢，本地後衞根本mark唔到佢。
─【公主病】─
嬌生慣養的女子，諸葛梓岐被指是長期病患者。
濫用指數：4
例句：咪睇佢青靚白淨，其實佢有公主病，好難服侍。
─【乾】─
英文Dry直譯，指感情生活空白，沒有愛情滋潤。
濫用指數：4
例句：Sammi獨居乾到裂。