哥本哈根氣候峯會到目前為止，好似係一場辯論大會，三大陣營互相施壓、拉攏，希望達到對自己陣營最有利嘅協議。歐美日嘅基本目標，利益大約相近，最大發展中國家中國印度巴西好明顯向經濟增長，不願犧牲GDP，第三陣營就以非洲及其他比較貧窮國家為主，佢哋自知力量有限，減排會傷害GDP，所以索性伸大手板，要歐美日（富國集團）放水，約每年二千億美元，扶助窮國減排，希拉莉就還價一千億美元。窮國集團傾向中印巴（當然中印巴三國亦各懷目的），富國集團就想拉攏窮國，向中印巴施壓。
外電報導，歐美談判代表赴會之時，預備taketheirglovesoff（甩開手套，即磨拳擦掌之意），要同中國玩鋪勁嘅。因是之故，中國代表之言論亦罕有咁強硬，外交部副部長何亞非直情指美國代表ToddStern冇常識。奧巴馬與溫總理碰頭有乜好傾呢？以前講吓天氣哈哈哈，現在與人講天氣，係一個好嚴肅、好有離間性嘅話題。
某日遇到專門研究氣候嘅博士L，問佢點睇？博士L話：「西方國家講削減排放總量，中國講削減人均排放量，彼此出發點完全唔同，世界人口約六十八億，中國印度就佔咗差不多二十四億，即35%，你話中印點可以同意削減絕對排放量吖。」佢講吓左丁山就明白，譬如三個人住一間屋（美國、西歐），排放量一定少過十三個人住一間屋（中國），但人哋三個人住一間舒服豪宅多年，乜都有齊；呢邊十三個人住緊一間七百呎公屋，有人要求兩間屋嘅排放總量同時削減，係唔係向公屋居民開玩笑？
為咗減少碳排放，中國大力推動興建核電站，聽說核電係最清潔能源，最少排放，而且安全（唔信嘅話，請問吓一位對這方面有研究嘅專家，城市大學校長郭位教授），但萬一有洩漏輻射之事，就會將人民嚇破膽，西方就係因為咁希望中國嘅核電站容許外國專家視察安全措施，中國為咗面子，到目前為止，堅決不肯，所以形成第二個大矛盾。氣候變化已演變成一個複雜國際政治問題，純嗌環保口號呃自己而已。