記者協會創新猷，本月起每月邀請政商紅人出席午餐會同行家近距離接觸，政務司司長唐英年為記協獻出第一次。早前佢到中大領榮譽學位時被柴台，可能猶有餘悸，噚日要求出席記者自報讀邊間大學，等佢數數有幾多中大畢業生，結果半場人舉手。雖然中大幫人多勢眾，但唐公子強作鎮定，話相信冇人會喺枱底彈出嚟示威。
雖然無人反枱，唔代表唐公子安全，中大畢業生、記協新任總幹事莊曉陽問唐公子，明年補選，佢會否鼓勵市民投票，谷高投票率？呼籲市民行使公民權利投票高官有責，但卻變相動員市民「公投」，因此呢個問題頗刁鑽，唐公子無奈hea答，「每位市民都應該行使佢哋公民責任。」司長咁講，大家識做啦。
市民應行使公民責任
本來唐公子可避此劫，因為記協原本請學者蔡子強做主持，不過蔡子強疑似感染豬流感，由於唐公子冇份優先打疫苗，一旦感染分分鐘連累半個政府總部，因此蔡子noshow，令到唐公子要硬食難題。