跌傷頭休養到今日已經146日嘅賭王何鴻燊，盛傳今明兩日會出院慶澳門回歸10周年，助手噚日分幾次送咗八個行李篋去醫院，相信係收拾細軟，安排賭王出院。
之前賭王由港安轉院養和好神秘，今次搬篋送衫任影唔嬲，似乎嚟真出院。二房揸fit人何超瓊噚晚證實已做好出院準備，但要睇天氣同賭王狀況，「做緊各樣嘅安排，交通方面都有各樣安排，幾時出院就未知，要問醫生，要睇番最近天氣，因為最近凍咗。」
領導人親臨澳門，難怪賭王咁「恨」出席慶典，超瓊亦話賭王好心急，「練定晒揮手，戰衣都readyo架。」外傳幾房人對賭王應否出院有分歧，超瓊話一切聽醫生意見，如果呢兩日唔出院，就會陪賭王留院做冬。