本是電影門外漢的向華勝，八十、九十年代眼見香港電影市道蓬勃，半途出家成立永盛電影公司拍起戲來，在無人看好的情況下，他卻炮製出無數賣座作品如《賭神》、《逃學威龍》、《最佳損友》及《整蠱專家》等，令不少電影人大跌眼鏡。但踏入九十年代末，這個影壇怪傑又忽然離開，公司全面停產避過影圈萎縮期。蟄伏10年，近日他看準內地龐大市場，揚言從未在影壇輸過的向華勝準備重出江湖，重鎚出擊，在2010年再創他的吸金新世紀。 撰文：陳月媚
香港電影工業曾經享有東方荷李活美譽，是繼美國之後全球第二大電影出口市場，高峯時期可年產近300齣電影，向華勝認為能有如此輝煌成就，是因為香港有一個龐大的外銷市場。但2000年以來，爛片成行成市，香港電影在海外市場的佔有率因而不斷下降，競爭優勢漸失，失去海外市場支持，港片無疑死路一條，向華勝怎肯做賠本生意，見好就收，速速離場。
自信 我喺影壇未輸過
歸隱期間，向華勝主力在內地營商，雖然沒投資拍電影，但他對內地市場相當留意，經過多年觀察，他認為喜劇仍是主流電影，日前他在尖沙嘴接受本報專訪時說：「呢幾年我有好多時間喺大陸，好留意內地電影市場，呢個係一個好驚人嘅市場，香港影市得救，一定係致力開拓呢個市場，而且呢個市場慢慢開始成熟，今年係時候出手啦！」
向華勝指內地現時有13億人口，消費人口約有5億人，一齣戲若有1,000萬人入場，已可大收逾2億票房，他說：「其實家喺內地一部戲收過億就話開慶功宴，我都覺得係可悲，我套復出之作《唐伯虎點秋香》續集係睇清形勢去開，票房係睇2億以上，搞電影咁多年，我諗搞商業片冇人厲害得過我，因為我喺影壇係未輸過。」
牢騷 冇劇本唔肯接戲
當前的影壇，制度跟以往已有很大分別，向華勝也直言吃不消，他說：「我唔明白點解一定要有劇本先可以搵演員拍戲，香港特色電影就係臨場度橋先至有神韻，最近我同章子怡傾戲，佢不但冇巨星派頭，仲話想跟我學氣功，佢對我徒手劈斷一塊雲石好有興趣，好想學。傾開偈先知原來佢好欣賞我公司以前嘅戲，大家都有合作意思，而且佢都冇要求一定要先睇劇本，演員點解唔識轉彎，最緊要係信我。」
向華勝指現在電影公司籌備一部戲最少要花上一年半時間，是因為演員都要求先看劇本才接戲，有了劇本又要花幾個月時間等內地合拍批文，之後可能又要花幾個月等演員排出檔期，他滿腹牢騷說：「我都叫做牌頭大，可以解決呢啲問題，但獨立公司我就真係為佢哋擔心，啲演員仲已經將自己片酬計埋內地市場，但佢又冇諗到如果部戲喺內地上唔到，咁又點呢？所以實力唔夠嘅細公司，係一定會慢慢俾市場淘汰。」
獵頭 黃曉明戲路好廣
向華勝投資電影講求狠、準、快，遇到具潛質的演員，會一口氣跟對方簽下幾份片約，記得當年周潤發拍永盛第一齣戲《英雄好漢》，只收60萬片酬，劉德華演《至尊無上》片酬30萬，而周星馳拍永盛第一齣戲，也不過收50萬，如今向華勝又看中內地第一當紅小生黃曉明，一口氣跟他簽了五部片約。
若以股票來形容演員，向華勝認為現時可長期持有的優質股，當數古天樂與黃曉明，所以要趁他們未水漲船高時趁早入市，他分析說：「睇到有潛質嘅演員我會搵佢哋簽番幾部戲，環顧影壇咁多小生，我覺得古天樂同黃曉明都係戲路可以好廣嘅演員，英雄、愛情同喜劇都可以拍，將來大把前途，特別係黃曉明，佢一個人可以演完楊過、許文強再演韋小寶，呢啲咁經典嘅角色，佢一個演晒都冇出事，假以時日，佢係前途無限。」
不滿 起迪士尼真係蠢
雖然近年向華勝留港時間甚少，但他對香港民生還是十分關心，對特區政府的施政感到相當失望，他不滿地說：「家個政府真係蠢得緊要，選擇喺香港搞迪士尼就係大錯特錯，一早應該起環球片場而唔係迪士尼，因為人哋歐美同日本都有迪士尼，人哋為乜要老遠走嚟香港呢個迷你版迪士尼玩呀？如果你諗住吸引內地人嚟，但班官有冇諗過內地遲早會起一個出嚟，到時香港點算？起環球片場就唔同，不斷有新戲上，有香港特色嘅環球片場就可以成日換新嘢入去，一定有吸引力，你睇吓由盛智文管理嘅海洋公園越做越有起色，受歡迎過迪士尼，係因為佢有諗頭，將鬼佬萬聖節中國化，好高明。」
影壇巨頭逐個批
向華勝成立的永盛電影，當年曾將王晶、李力持、周星馳、周潤發和劉德華等人推上事業高峯，離開影壇10年，如今他對這批仍然活躍的幕前幕後精英也有其獨特見解。
王晶 似啤膠工廠
「王晶家似開工廠多過似電影人，拍戲只求量，唔求質，佢原本係天才橫溢嘅導演，但心態極懶，勤力只得表面，佢唔會肯好英雄氣概咁咬緊牙關出真功夫拍部夠質素嘅大片出嚟，只係喺度啤膠，所以近年嚟你唔會見到佢拍好似《賭神》同《整蠱專家》呢啲好作品出嚟。」
周星馳 創作力不足
「周星馳嘅演技同導演都係一等一嘅，但創作方面佢需要搵人幫，佢搞古仔嘅天份不足，家仲要兼顧埋做幕後工作，冇兩、三年都開唔到一部戲，好明顯就係創作方面出咗事，如果李力持、陳文強同曾謹昌呢班創作好手唔係一個個咁離開佢，可能會對佢好啲。」
李力持 單飛失方向
「李力持同周星馳本來係最佳組合，但就偏偏要走向一條同歸於盡嘅路，佢兩個走埋一齊好有化學作用，家唔肯息干戈繼續合作，係觀眾損失。李力持離開星仔之後好似失咗方向咁，唔知係咪因為拍慣大粒明星，再同其他演員合作可能未適應到，家我搵佢返嚟拍《唐伯虎點秋香》續集，我會逼佢使出真功夫。」
周潤發 回歸有優勢
「周潤發去荷李活拍完一輪西片，最終選擇回歸拍華語片係正確嘅，佢成名係靠演技，去到荷李活，好多外國演員都好好戲，以自己嘅長處去攻人哋長處，當然佔唔到乜嘢優勢，所以佢喺荷李活發展咁多年嚟唔見有乜嘢突破，反而回歸中國市場，佢會有更大發揮。」
劉德華 近年冇突破
「劉德華係極之勤力嘅演員，但近年嚟好明顯冇突破，喺發仔同星仔相繼減產之後，好明顯佢係最大得益者，呢幾年好多公司都爭住搵佢拍戲，就係因為產量過多，又唔係部部戲保持一定質素，觀眾會對佢生厭，所以華仔以後揀戲應該小心啲，好好控制拍片量。」
