性格暴烈嘅藝人萬梓良（圖）好耐冇喺香港娛樂圈蒲頭，估唔到佢最近復出，唔係現身螢幕，反而涉足政壇。由左派吹雞搞「政制向前大走大聯盟」，一如所料成員都係熟口熟面嘅愛國愛港人士，最大驚喜應該係喺《流氓大亨》入面流住口水鼻涕對Do姐大叫「Sowhat!!!」嘅萬子哥。萬子曾經身穿「血衣」抗議無綫高層管理不善，原來佢對政改都熱血沸騰。
「漫畫大帝」黃玉郎都係大聯盟發起人之一，大聯盟發起人鄭耀棠冇透露點解上述兩人加盟，其他成員乏善可陳，梁振英、譚耀宗同吳光正呢啲係膽，拖幾隻腳包括查史美倫、李國章及劉皇發，聯盟之中至少有三對兄弟檔，包括田北俊同田北辰，霍震霆同霍震寰，以及廖長城同廖長江。