陳慧琳（Kelly）、陳茵媺以及張嘉兒噚日到旺角，為金至尊擔任剪綵嘉賓，吸引大批市民圍觀。三人均佩戴上名貴鑽飾，其中Kelly全身首飾合共1500萬，淨係隻13卡鑽石戒指已經價值1200萬，佢講笑話唔敢同市民握手，因為怕俾人偷走粒鑽石。
Kelly仲即場喺店內揀咗一粒1卡、價值5萬元嘅鑽石送畀囝囝劉昇，仲話考慮一年送一粒，送到個仔娶老婆為止。而千億新抱徐子淇嘅老竇徐傳順，係金至尊嘅副董事長，佢仲做代表送禮物畀Kelly。
歌手成炮灰感無奈
對於有指陳奕迅（Eason）及謝安琪（Kay）所屬嘅環球，與其他三間唱片公司因為歌曲MV版稅問題同無綫鬧翻，無綫總經理陳志雲亦坦言唱片公司嘅行動可能影響下月舉行《勁歌金曲》總選，於是有推測話古巨基同容祖兒會取代Eason同Kay得到最受歡迎男女歌星獎，Kelly話都有睇到有關報道，佢覺得唱片市道已經差咗好耐，希望件事快啲平息。但係提到Eason同Kay成為炮灰，Kelly就話：「冇辦法啦，每個台有自己評分方式，我家睇呢啲報道都唔會太上心。」
另外陳茵媺話冇諗過將來要收幾大粒鑽石戒指先至肯嫁，因為佢覺得個心鍾意對方先係最重要，而目前佢就最希望儲錢買粒大啲嘅鑽石送畀媽咪。