瑪麗醫院一哥個位花落誰家今日揭盅，八方得到消息，最終由九龍東聯網總監陸志聰（CC）跑出，只待醫管局董事局今日開會拍板。CC喺05年由廣華轉去做聯合總監，再升做九東聯網總監，冇耐又做埋瑪麗兼港島西呢個大聯網總監，升職如坐直升機，認真巴閉。
CC能夠揮低兩個對手瑪麗副總監陳志權同葛量洪總監李文豪，據稱優勢在做勻大細醫院總監及聯網總監。瑪麗雖然係名牌醫院，但人手流失嚴重，醫院本身又殘舊，大雨時有黃泥水冲入去㖭，如何執番正，好考CC功力，不過做過呢個位嘅人前途似錦，周一嶽就係人辦。陸志聰轉去瑪麗，醫管局又要搵人頂佢個位，音樂椅遊戲有排玩。