花旗股市前晚跌少少，噚日港股就跌多多，恒指唔見咗兩百點有多，不過成交好奀，港股暫時仲係整固格局，只係市場氣氛轉差咗。
噚晚聯儲局議息，利率應該唔會變，至於會後聲明估計同伯南克之前講嘅嘢差唔多，即係話花旗冇通脹問題，超低息環境可以繼續。
駿威C輪19301：駿威（203）噚日報收4.90元，逆市升0.4%。股價日前跌穿20日線後即刻回升，有機上試之前高位5.54元，可以諗吓隻C輪19301。
隻輪現價87仙，2010年6月29日到期，行使價4.80元，溢價15.7%，引伸波幅58%，有效槓桿3.3倍，正股升上5.54元，19301睇1.29元，正股跌穿4.60元，就沽咗隻輪止蝕。
俊樺