大市風向難料，由內銀股轉弱，資金轉往壽險股，然後再炒中港地產股、食品股……適逢澳門回歸十周年在即，賭股蠢蠢欲動。國家主席胡錦濤周六會到澳門主持第三屆特區政府就職典禮，順道同曾特首照吓肺。回歸十周年可喜可賀，呢個只得50多萬人口的小賭城，10年嚟成績有目共睹，即使08年咁差，失業率亦只係3%。
經濟唔好，但有賭未為輸，08年外來直接投資仍增長54億元至近240億元。澳門目前GDP入面70%來自賭業，人均收入近4萬美元。回歸以嚟最成功莫過於開放賭權，引入競爭。目前外資佔市場逾50%，喺唔再發新賭牌下，供過於求情況將大大改善，仲有2015年港珠澳大橋落成後，高鐵拉近全國距離，人流物流加快勢將旺上加旺。
連續多日企於10日線上
最近有過大海搏殺嘅朋友，會發覺自從放寬簽證，內地遊客有如泉湧，逼爆金沙中國（1928）嘅賭場，幾乎有荷官嘅賭台就有賭客。賭場亦十分醒目，除咗畀免費船飛香港人去玩，仲有中港台紅星定期搞演唱會。對香港人可能冇乜吸引力，但對內地客嚟講，賭大錢、聽好歌、食好嘢，即時將整個爛賭經驗「升呢」。所以睇番金沙本賬簿，博彩以外，旅遊業務收入亦非常可觀。
走勢上，金沙雖仍喺招股價下行，但估唔到比起永利澳門（1128）仲靚仔，喺10蚊邊就有人買吓，連續多日企於10日線以上，喺咁亂嘅市況實在非常難得。如果心水清，會留意到每逢胡主席出訪，留低過佢腳毛嘅企業，股價短線總會有運行，不過就唔係咁易估佢會睇邊行邊業。呢一次唔同，去澳門唔睇賭場，唔通睇桌上舞咩？
胡孟青