涂謹申再婚為民主黨冲喜，原來黨內喜事陸續有來；黨主席何俊仁出年家有喜事，二千金1月24日擺酒請飲。初做外父嘅仁哥忍住少談喜事，黨內兄弟指由於女婿非政圈人，仁哥唔想喧賓奪主，所以刻意低調嫁女，以免親家受騷擾。有人笑稱親家唔係賣慳電膽，絕無利益衝突咁話。
準新郎張國鈞減肥
有喜事嘅唔止民主黨，公民黨第二梯隊曾國豐明年1月底成家立室，迎娶因為公民黨而結緣嘅女朋友，趕得切虎年派利是。民建聯都唔執輸，副主席張國鈞明年2月迎娶女友，據講張國鈞正地獄式減肥，希望以最佳狀態接新娘。
外傳張國鈞可能出戰港島區補選，等佢度完蜜月先拍板都未遲，至於度蜜月地點，最有驚喜之選擇，梗係帶嬌妻去北極睇企鵝啦。