木不材以終天年，香港大學校長府一棵年逾40歲嘅印度橡樹卻冇咁好彩，趁佢臨終前，八方噚日見佢最後一面，祝佢一路好走。據講呢棵有成30米高嘅印度橡兩年前開始唔妥，樹幹越來越傾斜，隨時有倒塌危機，港大「樹王」詹志勇教授隔月就去睇吓呢棵樹，噚日確定棵樹冇得救，發出「死亡證」，校方聖誕節前就會將佢連根拔起，免除後患。
影響校長府第地基
詹教授指兩年前已發現橡樹有問題，樹冠開始稀疏，已一分為八嘅樹幹亦開始嚴重傾斜，部份樹幹壓爆校長府圍牆，巨型樹枝伸延至大學道行人路，危及途人好牙煙，為免赤柱冧樹奪命悲劇重演，「樹王」不得不忍痛斬樹。
呢棵橡樹亦危及校長徐立之，詹教授指樹根長約30米，影響校長府地基，分分鐘整冧校長府，人命關天，惟有犧牲棵樹。港大校園內中山廣場棵「開心樹」石栗年中被斬，今次再斬印度橡，詹教授話斬樹工程浩大得多，相信係港大創校以嚟最大型同最複雜嘅斬樹工程，因為要逐少將樹幹切割，之後再挖走地下樹根，預計要花成個星期、斥資10幾萬元，港大會要求承辦商將樹幹切粒做有機肥料。
趁校長離港時動工
雖然印度橡粗生，亦唔算稀有品種，不過一向主張救樹多過斬樹嘅詹志勇都唔想貿然下令鋸樹，其中一個救樹方案係用鋼索拉住樹幹，可惜環境所限辦不到，因此無奈斬樹。樹木生生不息，一棵印度橡倒下，有14棵樹站起來，詹志勇建議在原址種植多花多果實嘅假蘋婆同日本杜英。為免斬樹工程影響徐立之，詹志勇話會待校長不在港時先鋸樹，一來唔想滋擾校長，八方思疑可能怕校長觸景傷情。
mailto:[email protected]