香港球壇喜事接二連三，香港隊12.12擊敗日本，取得東亞運男足金牌，亦係香港首個綜合大賽足球冠軍；而由港人班主楊家誠領軍嘅伯明翰，周二晚就喺主場以2:1擊敗布力般流浪，創球會紀錄取得英超5連勝，亦喺球會36年嚟，首次在頂級聯賽5連勝，認真可喜可賀，若淨係計近5場戰績，更可膺「英超冠軍」，而伯明翰冠軍賠率有成5,000倍，有買趁早。
英超5連勝勁過魔車
有時有隊運起上嚟，就真係點都擋唔住，12分鐘布力般門前一輪混戰，個波左彈右彈，都落到伯明翰前鋒謝路美腳下，佢就一聲唔該送入網窩，伯明翰迅即先開紀錄。伯明翰呢場贏波絕唔唔止靠運，48分鐘就靠一個靚組織，施巴斯坦拿臣同卡爾一個靚撞牆，卡爾右路睇定定傳中，謝路美輕鬆射入，亦係呢位英格蘭小國腳今季第3個入球。雖然客軍有賴恩尼爾遜破蛋，叫做令餘下時間緊張啲，不過主隊眾志成城下，力保2:1勝果，取得5連勝。
伯明翰5連勝，唔單止破球會紀錄，如果淨係計近5場更係「英超冠軍」。環顧英超，曼聯近5場贏4場，都輸過畀維拉；睇埋歐洲球壇，強如巴塞近5場亦曾失分畀畢爾包，恐怕只有荷甲榜首川迪，取得聯賽12連勝，叫做勁過伯明翰。伯明翰領隊麥利殊賽後大讚球員：「我為佢哋感到自豪，其他人懷疑我哋仲可以走幾遠，我信眾將會接受挑戰。」
楊生好腳頭近8仗全贏盤
楊生入主伯明翰後，認真順風順水，除咗首仗作客以1:3不敵阿仙奴後，已保持8場不敗，呢8場波盤路都好靚仔，全部贏盤，跟楊生落注嘅賭友，可以有個快樂聖誕。不過楊生同麥利殊唔好開心住，下仗伯明翰就要作客愛華頓，都幾難打，之後拆禮物日更要主場對車路士。我求大俠鼓勵伯明翰眾將，要有香港隊精神，遇強越強，咁就冇有怕啦！