阿涂同阿Sue擺酒，多個高官畀面到賀，仲開金口上台唱歌，搞到好似半場高官演唱會咁，最驚喜係發掘咗新晉組合高官版Twins。話說當晚幾個副局長、政治助理上台高歌《分分鐘需要你》送畀一對新人，副局長蘇錦樑、特首辦主任譚志源意猶未盡，拎起現場伴奏樂隊兩支結他，自彈自唱一首福音歌祝福新人。
「公投」一面倒讚周一嶽
蘇錦樑同譚志源都係虔誠基督徒，邊彈邊唱達專業水準，全場陶醉。周一嶽、張建宗同林瑞麟三個局長都有上台唱歌。打頭陣嘅周一嶽最犀利，一曲《FirstofMay》人人嗌安哥；張建宗先唱《往事只能回味》，自動波唱多首《你的眼神》；林瑞麟則獻唱老歌《More》，雖則佢係人肉MP3，不過唱live不能錄音，聽佢唱歌，八方只可以講：不可一，不可再。
並非八方要求高，卿姐要求全場舉手公投三個局長歌藝，結果民意一面倒支持周一嶽，張建宗次之，林D9僅得寥落支持。